• Call Us
  • +25146 2206572

በደ/ብ/ብ/ህ/ክ /መንግስት የሳይንስና ኢንፎርሜሽን ቴክኖሎጂ ቢሮ ሲካሄድ የነበረው ሴክተር ጉባኤ በተሳካ ሁኔታ ተጠናቀቀ፡፡

ጉባኤበደ/ብ/ብ/ህ/ክ/መንግስት የሳይንስና ኢንፎርሜሽን ቴክኖሎጂ ቢሮ ከክልል ሴ/መ/ቤቶች ከተወጣጡ አመራሮች፣ ከዞን፣ከልዩ ወረዳ፣ ከአስሩም ዩኒቨርሲቲዎች ከመጡ ባለድርሻ አካት፣ከተቋሙ ሠራተኞችና ተጋባዥ እንግዶች ጋር የ2012 በጀት ዓመት ዕቅድ አፈፃጸም ሪፖርት በመገምገም የ10 ዓመት እና የ2013 በጀት ዓመት ዕቅድ ለመወያየት የተዘጋጀውና ከቀን 05—06/02/2013ዓ.ም ሲካሄድ የነበረው ሴክተር ጉባኤ በተሳካ ሁኔታ ተጠናቀቀ፡፡

የሳይንስና ኢንፎርሜሽን ቴክኖሎጂ ቢሮ ም/ኃላፊና የቢሮው ተወካይ የሆኑት አቶ ሀብታሙ ታረቀኝ ከዚህ ቀደም ስንከተለው የነበረው አሰራር ብዙ ተግዳሮቶች ያሉበትና ውጤቱም አመርቂ ስላልሆነ ተቋሙን እስከታችኛው መዋቅር በተጠናከረ መልኩ በአጭር ጊዜ ውስጥ ማደራጀት የሚመለከታቸው አካላት ሁሉ የቤት ሥራ መሆን አለበት ብለዋል፡፡ በሌላ በኩል ኮቪድ-19 ሰዎች ቴክኖሎጂን እንዲላመዱና እንዲጠቀሙ መልካም አጋጣሚ በመፍጠሩ በበጎ ጎኑ ልንወስድ ይገባናል ሲሉ ገልፀዋል፡፡

የሳይንስ ቴክኖሎጂ ፈጠራና ስርፀት ዘርፍ ኃላፊና የቢሮው ም/ኃላፊ የሆኑት አቶ ሙሂዲን ሁሴን የ2012 በጀት ዓመት ዕቅድ አፈፃፀም ሪፖርት ያቀረቡ ሲሆን ሪፖርቱን አስመልክቶ ከቤቱ ለተነሱ ጥያቄዎች ምላሽ ሰጥተዋል፡፡

የ10 ዓመቱን ዕቅድ ያቀረቡት የቢሮው ም/ኃላፊና ተወካይ የሆኑት አቶ ሀብታሙ ታረቀኝ የ10 ዓመቱን ዕቅድ ከግብ ለማድረስ በያለንበት የሚጠበቅብንን ተግባር ስንፈፅምና በጋራ መንቀሳቀስ ስንችል ብቻ ነው፡፡ በእያንዳንዱ የትኩረት አቅጣጫ ስር ያሉ ተግባራትን ግብ ለማሳካት ሁሉም አካል መረባረብ ይኖርበታል ብለዋ፡፡

ቴክኖሎጂ ለብቻው ዕድገት አያመጣም ያሉትና በኢኖቬሽን ቴክኖሎጂ ሚኒስተር የፖሊሲ ጥናት ዳይሬክቶሬት ዳይሬክተር የሆኑት አቶ ደስታ አበራ ቴክኖሎጂው ሁሉን አካታችና የሚጠበቀውን ዕድገት እንዲያመጣ የሚመራበት ሥርዓት (ዲጂታል ትራንስፎርሜሽን ስትራቴጂ) አስፈላጊነትና የምንፈልገው ግብ ላይ ለመድረስ ድጅታል ትራንስፎርሜሽን ስትራቴጂ መጠቀም ይኖርብንል ፡፡ እንዲሁም ዲጂታል ትራንስፎርሜሽን የሚረጋገጠው በዲጂታል መሠረቶች ላይ አይነተኛ ለውጥ ሲመጣ ነው ብለዋል፡፡

የደ/ክልል ርዕሰ መስተዳር አይሲቲ መሠረተ ልማት አማካሪ የሆኑት አቶ ሚኪያስ መላኩ በዲጂታል አሰራር ውስጥ ካልገባን ከላይ የሚናድብንን ናዳ እያየን እንዳቅማችን ሮጠን ማምለጥ ሲገባን ቆመን ናዳው እንዲወርድብ እንደመጠበቅ ይሆንብናል፡፡ ዲጂታል ትራንስፎርሜሽን ከግብ እንዲደርስ ከራሳችን ቤትና በእጃችን ካለው ቴክኖሎጂ መጀመር ይኖርብንል ብለዋል፡፡

በመጨረሻም የክልሉ ሳይንስና ኢንፎርሜሽን ቴክኖሎጂ ቢሮ ም/ኃላፊና ተወካይ የሆኑት አቶ ሀብታሙ ታረቀኝ በዚህ ጉባኤ ላይ የተለያዩ አካትና ተጋባዥ እንግዶች እንዲገኙ ያደረግንበት ዋናው ዓላማ በተነሱ ጉዳዮች ዙሪያ የሚመለከተው አካል ሁሉ የቤት ሥራ ይዞ በመሄድ በቴክኖሎጂው ዘርፍ መሠራት ያለባቸው ተግባራት ከግብ እንዲደርሱ የድርሻውን እንዲወጣ ለማድረግ ነው፡፡ በእኛም በኩል ተቋም ማደራጀት ወሳኝ ነውና እስከ ታችኛወ2 መዋቅር ድረስ ያሉ ተቋማትን በአጭር ጊዜውስጥ በማደራጀት ተገቢ የሆነ ሥራ ለመስራ ቁርጠኞች ነን ሲሉ ጉባኤውን ዘግተዋል፡፡