• Call Us
  • +25146 2206572

የደቡብ ክልል ሳይንስና ኢንፎርሜሽን ቴክኖሎጂ ቢሮ የሥራ ኃላፊዎና ሠራተኞች ለሀገር መከላከያ ሠራዊት ደም ለገሱ።

የኢትዮጵያን ህልውና ለማረጋገጥ መስዋዕትነት በመክፈል ላይ ለሚገኘው የሀገር መከላከያ ሠራዊት ሁለገብ ድጋፍ በማድረግ የዜግነት ግዴታን መወጣት እንደሚገባ ተጠቆመ፡፡

የደቡብ ክልል ሳይንስና ኢንፎርሜሽን ቴክኖሎጂ ቢሮ የሥራ ኃላፊዎችና ሠራተኞች ለመከላከያ ሠራዊት ደም ለግሰዋል፡፡

"ደማችን ለመከላከያ ሠራዊታችን!!" በሚል መርህ በመሥሪያ ቤቱ ቅጥር ግቢ በተካሄደው የደም ልገሳ ሥነ ስርዓት ላይ በምክትል የቢሮ ኃላፊ ማዕረግ የሳይንስና ስርጸት ዘርፍ ኃላፊ አቶ ሙሂዲን ሁሴን ባደረጉት ንግግር የሀገር መከላከያ ሠራዊት ለሀገር ህልውና እየከፈለ ላለው መስዋዕትነት መላው ሠራተኞችና የሥራ ኃላፊዎች የበኩላቸውን ድጋፍ አጠናክረው መቀጠልና” ከሠራዊቱ ጎን በቁርጠኝነት መሰለፍ እንደሚጠበቅባቸው ጠቁመዋል፡፡

የቢሮውሠራተኞችና የሥራ ኃላፊዎች ደማቸውን ለሠራዊቱ በመለገስ አጋርነታቸውን በተግባር ማስመስከራቸው ሀገራቸው የምትጠይቀውን ማንኛውንም ዓይነት መስዋዕትነት ለመክፈል ቁርጠኛ መሆናቸውን ያሳያል ያሉት አቶ ሙሂዲን በቀጣይም ሀብት በማሰባሰብና በሌሎችም ተግባራት ሀገርን ለማዳን እየተደረገ ያለውን ትግል ይበልጥ አጠናክረው እንዲቀጥሉ አሳስበዋል፡፡

ደም ከለገሱ ሠራተኞች መካከል አንዳንዶቹ በሰጡት አስተያየት የሀገር መከላከያ ሠራዊት ለዜጎች በሠላም መኖር መስዋዕትነት እየከፈለ በመሆኑ ደማቸውን ለሠራዊቱ በመለገስ አጋርነታቸውን ለመግለፅና ከጎኑ መሆናቸውን በተግባር ለማሳየት ደም መለገሳቸውን ገልፀዋል፡፡

በሥነ ስርዓቱ ላይ የቢሮው ሠራተኞችና የሥራ ኃላፊዎች ለሀገር መከላከያ ሠራዊት ደም የለገሱ ሲሆን በቀጣይም በሀገር ህልውና ላይ የተቃጣውን አደጋ ለመመከት ደም የመለገስ፣ ሀብት የማሰባሰብና ሌሎችም ተግባራት እንደሚያከናወኑ ታውቋል፡፡